Það vekur athygli  í nýjustu tölum landlæknisembættisins að biðlistar eftir hjartaþræðingum eru nánast engir, en 6 manns eru skráðir á biðlista.  Til samanburðar má geta þess að í febrúar mánuði á árinu 2009 voru 43 á biðlista eftir hjartaþræðingu.

Í greinargerð Landlæknis um fjölda fólks á biðlistum segir meðal annars.

Biðlistaupplýsingar eru tvíþættar, þ.e. listi með fjölda einstaklinga sem eru skráðir á biðlista og hafa beðið lengur en 3 mánuði og áætlaður biðtími eftir aðgerð. Upplýsingar um áætlaðan biðtíma nýtast sjúklingum þannig að þeir geti gert ráðstafanir varðandi vinnu og heimili og stjórnendum til að fá betri mynd af skipulagi aðgerða og skilvirkni sjúkrahúsa. Við túlkun biðlista ber að hafa eftirfarandi í huga:

• Biðlistar geta verið mismunandi eftir árstímum, t.d. vegna sumarleyfa starfsmanna. Ef ætlunin er að skoða þróun biðlista gefur því gleggsta mynd að bera saman samsvarandi tímabil milli ára.
• Hafa ber í huga að sjúklingar geta þurft að bíða mislengi eftir því á hvaða heilbrigðisstofnun og/eða hjá hvaða lækni þeir eru skráðir.
• Sjúklingar geta sjálfir í samráði við sinn lækni frestað aðgerð og þannig lengt biðina.

Ég hef áður nefnt það hér á hjartalíf að mér finnst töluverður munur á því hvort sé talað um biðlista eftir brjóstaminnkun eða hjartaþræðingum. Þ.e.a.s. alvarleiki þess sjúkdómsástands sem beðið er eftir aðgerð vegna, ætti að hafa meira vægi, eða alla vega fylgja með til upplýsinga.

Sama mál var til umræðu fyrir um ári síðan en þá voru eins og ég nefndi hér að ofan 43 á biðlista eftir hjartaþræðingu og höfðu semsagt beðið lengur en þrjá mánuði.
Þegar hinsvegar var skoðað hvað raunverulegur listi var fjölmennur reyndust um 150 manns vera á biðlista eftir hjartaþræðingu. Skýringin var auðvitað sú að rúmlega 100 af þeim sem voru á biðlista höfðu beðið skemur en þrjá mánuði og flokkaðist sá listi undir vinnulista og voru þar af leiðandi ekki taldir með á biðlistanum.

Vandinn er sá að það lifa það ekki allir af að bíða í þessa þrjá mánuði sem þeir bíða áður en þeir eru skilgreindir sem á biðlista, og þess vegna finnst mér þetta villandi. Það er í sjálfu sér gott mál að aðeins 6 séu á biðlista í dag, en hvað bíða margir á vinnulista?

Þáverandi Landlæknir hafði eftirfarandi um málið að segja fyrir um ári síðan.

Fólk er sett á biðlista samkvæmt málvenju þegar aðgerð er ekki gerð umsvifalaust, en við teljum að um sé að ræða vinnulista þegar biðin er styttri en þrír mánuðir,“ segir Matthías Halldórsson landlæknir. Hann segir ennfremur að þetta sé í samræmi við venjur sem tíðkist í öðrum löndum og sé því hægt að nota til samanburðar við þau til að fylgjast með þróun yfir tímabil.
Matthías bendir á að biðlistar séu að sjálfsögðu misjafnlega alvarlegir. Þannig þoli flestir ágætlega að bíða í þrjá mánuði eftir hálskirtlatöku eða að fjarlægja ský á auga. Hins vegar þoli fólk síður slíka bið eftir hjartaþræðingu, svo dæmi sé tekið.
„Hér áður fyrr mældum við einungis breytingar á fjölda einstaklinga sem biðu eftir aðgerð, en það segir sjúklingi auðvitað meira hversu lengi viðkomandi þarf að bíða.“

Er þetta ekki einmitt kjarni málsins, að upplýsa sjúklinga um raunverulegan fjölda þeirra sem eru á biðlista. Heilbrigðisstofnanir geta svo skilgreint vinnulista eins og þeim hentar en almenningur ætti að fá tölurnar eins og þær eru í raun.

Århus 11.03.2010

Björn Ófeigsson

• Bæta við
• Leita

Athugasemdir (0)

Skrifa athugasemd

Upplýsingar um þig:

Nafn:

Netfang:

Athugasemd:

Titill:

Skilaboð:

Öryggisatriði

Vinsamlegast skrifaðu öryggis-kóðann sem þú sérð í myndinni hér fyrir ofan.